व्यासको छाङरुस्थित गागामा सशस्त्र प्रहरीको भवन निर्माण कार्य शुरु

व्यासको छाङरुस्थित गागामा सशस्त्र प्रहरीको भवन निर्माण कार्य शुरु भएको छ । गृहमन्त्री रामबहादुर थापाले यही असोज ९ गते भवनको शिलान्यास गरेसँगै निर्माण व्यवसायीले भवन निर्माणको कार्य शुरु गरेको हो । छाङरुमा सशस्त्र प्रहरीलाई बाह्रै महिना बस्न मिल्ने गरी भवन निर्माण शुरु गरिएको छ । गागामा सशस्त्र प्रहरीको अत्याधुनिक सुविधासहितको ४० कोठे भवनको निर्माण कार्य शुरु भएको निर्माण व्यवसायी सुरेश चन्दले बताउनुभयो । भारतले अतिक्रमण गरेको कालापानी भन्दा झण्डै १४ किलोमिटर तल छाङरुमा सशस्त्र प्रहरी बल नेपाल नम्बर ५० गुल्मको अत्याधुनिक भवन निर्माण हुन लागेको हो ।

एक वर्षभित्रै निर्माण सक्ने गरी कुल रुपियाँ १० करोड लागतमा भवन निर्माणको काम शुरु गरिएको निर्माण व्यवसायी चन्दले जानकारी दिनुभयो । उहाँले यो दुई महिनाको अवधीमा भुईतलामा २० कोठा निर्माण गरि सक्ने लक्ष्य रहेको जनाउनुभयो । ठेकेदारले सिम्रीक हेलिकप्टरमार्फत जेनरेटरलगायत सामाग्री छांगरु पु¥याएको छ । “यसै हप्ता निर्माणमा प्रयोग हुने सामग्री ढुवानी भइसकेको छ”, चन्दले भन्नुभयो, “मौसमले साथ दियो भने मंसिरसम्म तल्लो तलामा सशस्त्र प्रहरी बस्ने मिल्ने गरी काम हुन्छ ।”

व्यासको कौवा र तिंकरमा पनि सशस्त्र प्रहरीको बोर्डर आउट पोष्ट राख्ने सरकारको तयारी छ । तिंकरमा सशस्त्र प्रहरीको भवन निर्माणका लागि रु एक करोड बजेट विनियोजन भइसकेको छ । अहिले निर्माण व्यवसायीले भवनका लागि जग खन्ने काम शुरु गरेको छ । भवन निर्माणमा ४०/४५ मजदूर परिचालन गरिएको छ । भवनको जगका लागि चाहिने ढुङ्गा सङ्कलनको काम पनि सँगसँगै भइरहेको छ । मंसिरदेखि हिमपात शुरु हुने मौसम भएका कारण निर्माण व्यवसायीले काममा तिव्रता दिने गरी तयारी थालेको छ । यो क्षेत्रमा पाँचदेखि १० फिटसम्म हिउँ जम्ने गर्छ । यहाँका स्थानीयवासी मंसिर पहिलो साता सदरमुकाम खलंगा बसाइ सर्छन् । रासस

नेपाल डेली पोस्ट

नेपाल डेली पोस्ट डट कम वेवसाइट एन टि बि मिडिया को आधिकारिक न्यूज पोर्टल हो। नेपाली भाषाको यो वेवसाइटले समाचार, मनोरञ्जन, अर्थ, खेलकुद, विश्व, बिज्ञान, प्रविधि, स्वास्थ्य, प्रवास, भिडियो तथा बिबिध समाचार समेट्ने गर्दछ।

Leave a Reply

Your email address will not be published. Required fields are marked *