आगो ताप्न जाने उपयोगी नजाने काल

चिसो मौसममा न्यानोका लागि घर–कोठामा आगो बालेर सुत्दा बेला बेलामा निसास्सिएर ज्यान जानेसम्मका घटना हुने गरेका छन् । विशेष गरी जाडो छल्न तथा कोठा तातो पार्न कोइला, ब्रिकेट, भुस र दाउरा बालेर सुत्दा अक्सिजनको अभावमा निसास्सिएर सर्वसाधारणले अकालमै ज्यान गुमाउने गरेका छन् ।

सोमबार राति पनि कीर्तिपुरमा यस्तै दुःखद घटना भएको छ । कीर्तिपुरको सुन्दरबजारमा कोठा तताउन कोइला बालेर सुतेका आमाछोराको मृत्यु भएको छ । महानगरीय प्रहरी वृत्त कीर्तिपुरका अनुसार मृत्यु हुनेमा स्थानीय नवराज रञ्जितकारकी श्रीमती शर्मिला र दुई महिनाका छोरा छन् । सुत्केरी श्रीमती र शिशुलाई साँझ कोइलाको रापमा सेकाइसकेपछि कोठालाई तातो पार्न मकलमा कोइला बालेर सुत्दा निसास्सिएर आमा र छोराको मृत्यु भएको जानकारी प्रहरीले दिएको छ । श्रीमती र शिशुलाई खाटमा सुताई नवराज आफू भुइँमा सुत्नुभएको थियो ।

बिहान भुइँमा खसेको ओढ्ने ओढाउन उठ्दा श्रीमती र छोरालाई अचेत अवस्थामा भेट्टाएपछि उपचारका लागि अस्पताल लैजाँदै गर्दा पनि बचाउन सक्नुभएन । दुवै जनाको मृत्यु भइसकेको थियो । यस्तै दुःखद घटना यसअघि गोँगबु मित्रनगर र कुलेश्वरमा भइसकेका छन् । मित्रनगरमा पनि कोठाभित्र मकल बालेर सुत्दा आमा र चार महिनाको शिशु बेहोश अवस्थामा फेला परेका थिए । आमा बाँच्न सफल भए पनि शिशुले ज्यान गुमाए ।
नेपाल प्रहरीका अनुसार प्रत्येक वर्ष नवजात शिशु र आमा गरी एक सयभन्दा बढीको अकालमै ज्यान जाने गरेको छ । कोठामा आगो बाल्ने र कोठा तातो हुन्छ भन्दै झ्यालढोका थुनेर सुत्ने गर्दा अकालमै ज्यान जाने गरेको हो । केन्द्रीय प्रहरी प्रवक्ता विश्वराज पोखरेल भन्नुहुन्छ, “कङ्क्रिटबाट निर्मित साँघुरो घर तथा कोठामा दाउरा, कोइला र ब्रिकेट बालेर सुत्नु आत्महत्या गर्नुजस्तै हो । आगो बालेर सुते पनि झ्याल र भेन्टिलेसन पूरै खुला राख्नुपर्छ । ”

त्यस्तै आगोका कारण निसास्सिएर मृत्यु हुने मात्र नभई आगलागी हुने समस्या पनि त्यत्तिकै हुन्छ । साँझ शिशु तथा आमालाई सेकताप गर्न बालेको आगो निभाउन र धुवाँ निस्कन छाडेपछि सुत्न उहाँको सुझाव छ ।

वरिष्ठ चिकित्सक महेन्द्र विष्टका अनुसार उचित तरिकाले आगोको प्रयोग गर्न सके जीवन उपयोगी, नजाने काल हुने गरेको छ । कोठा तताउन वा न्यानो पार्न दाउरा, कोइला, गुइँठा, ब्रिकेट र भुस (काठको धुलो) आदि बाल्ने गर्छौं । मट्टितेल, ग्याँस र बिजुली हिटर बाल्ने गरिन्छ । उहाँ भन्नुहुन्छ, “यस्तो अवस्थामा झ्यालढोका बन्द गर्नु हँुदैन । बाहिरबाट कोठाभित्र अक्सिजन छिर्ने अवस्था हुनुपर्छ । झ्यालढोका बन्द गरी सुत्दा ज्यानै जान्छ ‘सेकताप’ गर्दा पनि झ्याल खुला राख्नुपर्छ । ”

उहाँले सामान्य लापरबाहीका कारण यस्तो दुर्घटना हुने गरेको जानकारी दिनुभयो । घरकोठा बन्द राखी आगो बाल्दा धुवाँ तथा तापका कारण विषालु ग्यासको मात्रा बढ्न जान्छ । अक्सिजन जाने बाटो बन्द भएसँगै विषालु ग्याँसको मात्रा बढ्न गई सुतिरहेको अवस्था मृत्यु हुन्छ ।
खासगरी गर्भवती, सुत्केरी महिला, बच्चा र ज्येष्ठ नागरिकलाई बढी असर पार्ने गरेको छ । रक्तअल्पता, मुटु, श्वासप्रश्वाससम्बन्धी समस्या भएकाहरू पनि छिटो प्रभावित हुन्छन् । प्रहरीले सुत्केरी तथा शिशु सेक्ने र कोठा तताउने नाममा झ्यालढोका बन्द नगर्न आग्रह गरेको छ ।

नेपाल डेली पोस्ट

नेपाल डेली पोस्ट डट कम वेवसाइट एन टि बि मिडिया को आधिकारिक न्यूज पोर्टल हो। नेपाली भाषाको यो वेवसाइटले समाचार, मनोरञ्जन, अर्थ, खेलकुद, विश्व, बिज्ञान, प्रविधि, स्वास्थ्य, प्रवास, भिडियो तथा बिबिध समाचार समेट्ने गर्दछ।

Leave a Reply

Your email address will not be published. Required fields are marked *