दशैँ पर्वलाई लक्षित गरी किनमेलका लागि सीमावर्ती भारतीय बजारमा भिड, नेपाली बजार सुनसान

एजेन्सी, वीरगञ्ज। हेटौँडा उपमहानगरपालिका–११ बस्ने हरि घिमिरे दशैँ पर्वलाई लक्षित गरी किनमेलका लागि सीमावर्ती भारतीय बजार रक्सौलमा भेटिनुभयो । भारतीय बजारमा कपडाहरु सस्तोमा पाइने भएकाले यहाँ आएको उहाँले राससलाई बताउनुभयो ।नेपाली बजार हेटौँडा, नारायणगढभन्दा भारतीय बजार रक्सौलमा २० देखि ३० प्रतिशत सस्तोमा सामान पाउने भएकाले किनमेलका लागि रक्सौल बजार नेपाली उपभोक्ताहरुको रोजाइमा परेको छ । अन्य वर्षभन्दा यस वर्षको पर्व खर्चिलो भएकाले केही रकम बचत हुने हुँदा किनमेलका लागि भारतीय बजार आएको घिमिरेले बताउनुभयो ।

स्थानीय बजारमा दैनिक उपभोग्य सामानको कृत्रिम मूल्य सिर्जना गरी व्यापारीहरुले मनोमानी ढङ्गबाट बढी मूल्यमा बेच्ने गरेकाले कम आय भएका नेपाली उपभोक्ताहरुको रोजाइमा अहिले भारतीय बजार रक्सौल परेको हो । ९० प्रतिशत नेपालीहरुको रोजाइमा भारतीय बजार रक्सौल परेकाले नेपाली बजार वीरगञ्ज, भिस्वा, पोखरीयालगायतका बजारहरु सुनसान छन् भने भारतीय बजारहरु नेपाली उपभोक्ताका कारण गुलजार भएका छन् ।

वीरगञ्जका बजार सुनसान देखिन्छन् भने भारतीय बजार रक्सौलमा नेपाली उपभोक्ताहरुको भीड लाग्न थालेपछि त्यहाँको दैनिक व्यापार रु एक करोड बराबरको हुने गरेको टेक्सटायल चेम्बर अफ कमर्स कार्यालय रक्सौलले जनाएको छ । “नेपाली उपभोक्ताहरुको पहिलो रोजाइ भनेको कपडा हो”, कमर्सका अध्यक्ष अरुणकुमार गुप्ताले भन्नुभयो, “नेपालीहरु किनमेल गर्न रक्सौल आएनन् भने यहाँको व्यापार चौपट हुने थियो ।

नेपालीहरुका कारण गुलजार रहेको भारतीय बजार रक्सौलका व्यापारीहरुले नेपाली उपभोक्तालाई आकर्षित गर्न विभिन्न प्रकारका योजनासमेत ल्याएको देखिन्छ ।“भारतबाट वीरगञ्ज बजारमा आउने कपडामध्ये अधिकांश कपडा भन्सार छली तस्करीमार्फत भित्रिने गरे पनि यहाँको बजारमा कपडालगायत दैनिक उपभोग्य सामानको कृत्रिम मूल्य सिर्जना गरी व्यापारीहरुले बढी मूल्यमा बेच्ने गरेको तर त्यही सामान रक्सौलमा सस्तो पाइने भएकाले किनमेलका लागि रक्सौल आएको छु”, नारायणघाटकी सीमादेवी भन्नुहुन्छ, “भारतीय व्यापारीहरुको व्यवहार पनि राम्रो हुने र सस्तो दरमा सामान पनि पाइने भएकाले हाम्रो पहिलो रोजाइमा भारतीय बजार परेको छ ।”

सीमावर्ती रक्सौल बजारमा २०० को हाराहारीमा कपडा पसल छन् भने दैनिक उपभोग्यको सामान बेच्ने किराना पसल ५० वटा रहेका छन् । नेपाली बजारमा सटही काउन्टर नभएकाले नेपाली उपभोक्ताहरु रक्सौलमा नेपाली रुपैयाँ साट्दा वा त्यहाँका पसलेहरुलाई नेपाली रुपैयाँ दिँदा पसलेहरुले बढी ‘बट्टा’ काट्ने समस्या रहेको वीरगञ्ज महानगरपालिका–२४ रामगढवाका सञ्जयकुमार प्रजापतिको गुनासो रहेको छ ।

“नब्बे प्रतिशत नेपाली ग्राहकका कारण रक्सौलको दैनिक व्यापार एक करोड रुपैयाँ बराबरको रहेको छ”, खादी भण्डारका सञ्चालक श्याम लामा भन्नुहुन्छ, “नेपाली ग्राहक नआएका भए यहाँको व्यापार घाटा उच्च हुने थियो ।”पूर्वी चम्पारण जिल्लाअन्तर्गत पर्ने रक्सौल बजार हिन्दूहरुको महान चाड बडा दशैँ, दिपावली र छठ पर्वलाई लक्षित गरी भारतीय व्यापारीहरुले नेपाली ग्राहक तान्न असल व्यवहार, मिठो बोली तथा विभिन्न किसिमको ‘स्किम’ राख्ने गरेकाले पनि नेपाली ग्राहकहरु भारतीय बजारतर्फ आकर्षित हुने गरेका छन् ।

– रासस

नेपाल डेली पोस्ट

नेपाल डेली पोस्ट डट कम वेवसाइट एन टि बि मिडिया को आधिकारिक न्यूज पोर्टल हो। नेपाली भाषाको यो वेवसाइटले समाचार, मनोरञ्जन, अर्थ, खेलकुद, विश्व, बिज्ञान, प्रविधि, स्वास्थ्य, प्रवास, भिडियो तथा बिबिध समाचार समेट्ने गर्दछ।

Leave a Reply

Your email address will not be published. Required fields are marked *